Tomboy In The Making

Ako ay ipinanganak na tunay na babae ngunit itinadhanang maging pusong lalake.

Bata pa lang ako ay 50-50 na ang lagay ko. Wala akong malubhang sakit na ikamamatay ko ngunit may malubhang pagtataka naman ako tungkol sa kasarian ko. Nung bata ako madalas ako makipaglaro sa mga pinsan ko madalas din akong maglaro ng magisa lang dahil wala akong kapatid. Oo solong anak ako kaya mahirap na ibulgar ko ang tunay kong pagkatao at dahil na rin karamihan sa kamag-anak ko ay mapanghusga sa mga bakla at tomboy, hindi nila tanggap ang mga ito. Balik tayo sa paglalaro ko. Kapag naglalaro kami ng mga pinsan ko hindi ako madalas makipaglaro sa mga pinsan kong babae laging doon sa mga pinsan kong lalaki dahil na din siguro mas kasing edad ko ang mga pinsan kong lalaki. Robot, tau-tauhan, kotse-kotsehan, at kung anu-anong larong panlalaki ang nilalaro ko. Masaya naman ako dito. Naglalaro din ako ng mga pambabaeng laro tulad ng lutu-lutuan, bahay-bahayan at iba pa. Normal lang siguro yun kapag bata pa. Ang hindi normal ay ang kagustuhan kong maging lalaki.

May mga manyika din ako na binibili sakin ng mga magulang ko. Kapag ako lang magisa sila ang mga kalaro ko. Mukhang normal lang dahil babae ako kaya manyika ang nilalaro ko pero ang hindi normal ay ang kunwari ay ako yung tatay at sila naman ang mga anak ko.

May tita akong mahilig akong asarin at dahil bata pa ako kung anu-ano ang tinatanong nila sakin at madalas ay para utuin lang ako. Tinatanong ako palagi ng tita ko kung ano ako "girl or boy?" at proud ko namang isasagot "boy!" matatawa ang tita ko at sasabihing "hindi girl ka!, sabihin mo girl ako" at ako naman ay susunod at sasabihin ng mahina "girl ako.."

Nang ako ay nagaaral na, madalas kaming pinapabasa ng sabay-sabay ng aming guro at nagtataka ako dahil kakaiba ang boses ko kumpara sa mga kaklase kong babae. Boses lalaki kasi ako hindi ko alam kung sadyang nadedevelop yun kapag nakatakda ka nang maging tomboy in the future. Baka nga unang nadedevelop ang adam's apple ng mga batang tomboy kumpara sa mga lalaki. Wala naman akong ininom na kahit ano para magboses lalaki ako. Basta na lang naging ganito. Gaya na din ng mga batang bakla, nagiging boses bakla sila -- may scientific explanation kaya dito?

Madalas akong asarin ng mga kaklase ko nung bata pa ako. Lalo na yung isa kong kaklase nung nasa elementarya pa ako hinding hindi ko siya malilimutan dahil ilang beses niya akong tinawag na tomboy, tibo, tbird at kung anu-ano pa. Katabi ko siya noon idol ko nga siya dahil malakas siyang mangasar at ilang beses niya ako napaiyak kahit na matapang ako. Minsan ay may ballpen siya na ang tatak ay Tombow pinabasa niya sa akin ito at sinabing ballpen ko daw iyon. Marinig ko lang ang salitang tomboy dati ay kinikilabutan na ako sa hiya, ni hindi ko nga mabigkas ang salitang ito.

Dahil idol ko nga ang kaklase ko na iyon naging mapangasar din ako mapababae man o lalaki ay nakikipagasaran ako. Ang madalas kong asarin ay yung kaklase kong babae dati dahil crush ko siya pero hindi niya alam yun ilang beses ko din siya napaiyak pero mabait siya kaya hindi siya nagagalit. Itatago ko na lang siya sa pangalang Jane. Naging bully ako, sobrang bully at madalas ay nasa guidance office ako kaya ayaw din sa akin ng mga teacher ko.

Turo sa akin ng mga magulang ko lagi akong magdasal bago matulog. Sinusunod ko naman ito palagi at hindi nakakalimot. Nung bata ako ang palagi kong wish at pinagdadasal bago matulog ay "sana po magkabird na ako pagkagising ko".

Ganyan ako lumaki. Ganyan nahasa ang pagiging tomboy ko kaya ngayon heto ako at ibinabahagi sa inyo ang pagbloom ng katomboyan ko.